查太話，自從佢○七年四月上任教資會主席後，大大話話總共去咗八大院校二十八次咁多，通常第一次去到間院校，就會同管理層會面，第二次更加會直踩落師生論壇，同學生嚟個真情對話，親自解釋教資會做緊啲咩。佢咁講，無非係要回應外界對教資會嘅批評，譬如早前先有聲音話教資會成日閂埋門做嘢、自己顧自己，搞到院校中人都有怨氣，立法會更有個動議要求檢討教資會嘅職能，查太喺院校同公共宣傳中出招，都係想挽回外界眼中教資會嘅形象啫。

查太仲話，有啲院校佢會落去三、四次，今年仲有個會面主題，就係同教務會嘅教授打交道，依家只係剩低三間未做，不過已經排晒期咁話，總之一間都唔會少。同院校多啲溝通係好事，只係查太好似數白欖咁高唱自己做過乜，就未免畀人感覺好hard-sell喇！