話說當日白鴿黨嘅甘乃威要求同馬利德會面，水務署急召埋其他黨派議員一齊傾，但係一向代基層發聲嘅工聯四名議員，竟然冇一個人收到水務署嘅開會通知電話，質疑水務署亂咁嚟，召集議員開會毫無準則，如果只係搵港島直選議員，點解前日有功能組別議員到場呢？如果邀請工務小組委員會委員，點解唔係委員嘅進出口界黃定光又會現身呢？

富貴黨張宇人亦話，黨友劉健儀同方剛都唔喺香港，唔知佢哋收唔收到水務署電話，佢自己就肯定冇收過。咁會唔會聽唔到水務署電話呀？肥仔張語帶嘲諷咁話，記者一打就通，冇理由水務署特別黑仔啩！

水務署發言人先話電話由馬利德嘅秘書打出，應該打晒畀全體六十位議員，可能有議員聽唔到電話咁話；之後又修正話要慢慢求證打電話嘅事。連咁嘅回覆都亂晒龍，水務署真係得o架喇！