施政報告諮詢工作密鑼緊鼓咁進行，負責落地區諮詢嘅係一眾副局長同政治助理，佢哋雖然因此唔使畀人批評冇嘢做，但落區表現就言人人殊，之前民政署已舉行咗兩場地區諮詢會，以商務及經濟發展局副局長蘇錦樑同發展局政治助理張文韜嗰場最冷清，得六十幾人。尋日，食物及衞生局副局長梁卓偉同政治助理陳智遠就去觀塘做諮詢會，梁卓偉就賣口乖，打破冷場宿命。
尋日嘅諮詢會有唔少觀塘區市民出席，個禮堂都坐滿咗，中途仲要不斷加座位。點解居民咁捧場？或者係與梁卓偉一開始就派高帽、賣口乖有關，佢先大讚居民好合作，又大談自己同觀塘區關係密切，氹到居民好開心，所謂不打笑面人嘛。
居民喺諮詢會上發表好多意見，由失業到普選、男女平權到唔識咩係六大產業都有，梁卓偉每次回答超過十二分鐘，最後咪過骨囉。