本文重點
本港貴金屬儲存庫尋日喺機場開幕，呢件香港大事梗係唔少得政府高官嚟抽水啦！財政司司長鬍鬚曾係主禮嘉賓之一，佢致詞時仲晒命話呢個貴金屬儲存庫設備令人印象深刻，香港終於擁有自己嘅「Fort Knox」（諾克斯堡）喇！好多人都知道諾克斯堡係美國儲存國家資產嘅金庫，亦都知道個金庫喺荷里活電影入面成日被洗劫，鬍鬚曾亂噏當食生菜，攞佢嚟形容香港嘅金庫，真係冇佢收。
呢個貴金屬儲存庫係本港作為國際金融中心地位嘅措施之一，因為香港現有嘅金融產品種類較少，有咗呢個金庫，就可以做多啲黃金交收。據講，年尾本港就開始推出黃金期貨，又有好多大客要存黃金，所以呢個金庫嘅安全性好重要。
偏偏鬍鬚曾尋日致詞時就開口夾着脷，話個金庫設施完善，坐落喺世界最繁忙嘅機場裏邊，仲用「我哋嘅『Fort Knox』（諾克斯堡）」嚟形容個金庫，話金庫投入運作之後，可進一步提升香港嘅國際金融同物流中心嘅地位。
噏錯嘢不知悔改
佢嘅說話本來係恭維呢個金庫設施同美國諾克斯堡有得揮，但佢忽略咗荷里活電影成日將諾克斯堡描述為國際大盜打劫嘅目標，連007系列嘅電影都曾經以此為題材。呢啲打劫事件有冇真正發生不得而知，但香港嘅金庫啱啱開幕，收到呢個祝福真係唔知係好事定壞事。
鬍鬚曾噏錯嘢已唔係新聞，弊在佢成日衰多口又不知悔改，或者負責貴金屬儲存庫保安嘅機構，應該情商鬍鬚曾入去機場客串做保安。當然啦，入去銅牆鐵壁前，佢最好先封嘴、帶齊架生，費事連累呢座香港諾克斯堡啦。