03/09/2009

播放本新聞相關短片

博客擂台:禁煙海報串錯字

 一個全新的報上部落格,每日與你暢談社會至Hit話題,剖析問題所在。

小白觀點:好彩冇變控「辣椒仔」辦

衞生署控煙辦公室為咗新一輪嘅控煙行動,印咗大批海報周街貼,點知將香煙cigarette串錯為cigaratte。呢個咁簡單嘅字連小學生都串得啱啦,因乜事班受過高深教育嘅衞生署官爺,竟然會連e同a都搞得錯呢?

哦,其實原因好簡單,有冇聽過一個叫Freudian Slip嘅心理學名詞呀?其實即係講漏嘴。串錯字嗰位喺cigar之後用a唔用e,明顯佢係一個雪茄愛好者,先一個唔覺意想打Cigar Aficionado(雪茄狂迷)。

不過好彩佢啲英文都唔算弱,冇將控煙辦英文串錯做TABASCO Control Office,否則班巡查人員去餐廳就忙囉,既要控煙,又要查邊個食Pizza時有落過「辣椒仔」。

網址:www.sunsiupak.blogspot.com

網友觀點...X)...

[ mandom ]

依家啲所謂才女,都係成日有錯別字啦,有乜嘢值得大驚小怪吖!

[ oliva ]

哈哈,真係笑大人個口,學咩人禁煙吖,唔識串就寫中文啦,不過中文字都可能寫錯,咁咪仲樣衰。

[ Gibs ]

都係好事嚟嘅,你睇睇張海報中文有冇錯字吖,冇吖嘛,證明母語教學係幾咁成功。

[ cc ]

未準備好禁乜嘢煙吖,尋日見到啲食環署員工換咗個冇煙灰缸嘅垃圾桶,啲人都照舊掟喺個頂度,燒到一笪笪冇人理。

阿豪觀點:警告:食煙令人神志不清

衞生署控煙辦印嘅禁煙海報,居然連主角cigarette都串錯成cigaratte,搞笑程度直逼老差骨唔識用槍,仲扭傷自己隻腳。回心一諗,你隨街問一個小學生都知cigarette點串啦,之所以犯如此低級錯誤,必定另有內情。

第一種可能,係控煙辦入面有人不滿待遇繼而抗爭,暗中搗蛋令衞生署出醜。至於第二種可能,就係呢張蝦碌海報,根本係反吸煙策略。你知啦,當局反吸煙一味靠嚇,又話食咗會陽痿,又話食咗會爛腳,咁唔爭在話食煙會令人神志不清啦,連A同E都唔識分,你話幾大劑!See!食得煙多個人零舍易bull sit(唔係串錯字,bull sit即係隻牛坐喺度,形容一個人笨拙也),問你怕未?

網友觀點...X)...

[ 匿 名 ]

衞生署啲官好有學識㗎,你話人哋串錯字,佢肯定大大聲窒番轉頭:咩呀,我二十四個英文字母倒番轉頭背都得呀!

[ 匿 名 ]

個廣告係「微調」畀啲學歷唔高而又吸煙嘅人睇㗎。

[ 喪 標 ]

有冇搞錯呀?班官咁高人工一個月,串個簡單生字都出錯?除非佢人工一部分,係資助佢哋再由中學讀起啦!

[ Patrick Lai ]

早排班控煙辦合約員工咪好不滿冇得轉長工嘅,都唔知係咪有人玩嘢!

網址:www.lukchiho.blogspot.com