事實上，申訴專員公署曾主動調查機電署對升降機嘅監管工作，申訴專員黎年直指機電署「制度鬆散，執法不嚴」，制度漏洞多多，管理明顯出現問題，並向機電署提出十三項「補鑊」建議。

機電署畀申訴專員公署插到飛起，以為佢左耳入右耳出就算啦。奇喎，唔知係咪轉咗死性呢，失驚無神推出一個保養承建商評級制補鑊，本月起每季公開註冊升降機承建商保養表現評級，咁機電署以後就唔怕再畀人話游手好閒冇做嘢啦！

叮佢個鎯鎯，睇到呢個評級制度都唔知好嬲定好笑，講就講到天花龍鳳咁，查實唔知嘅就嚇死，知嘅就笑到碌地。原來全部都係為做而做，對升降機承建商依然係冇監冇管。

例如機電署話要每季抽查唔同承建商保養嘅升降機，如果有機件發生故障就會扣分，白紙黑字寫到明，安全鉗或制動器失效就扣十五分，開門掣失效扣三分，聽落好似幾有阻嚇力咁。

不過扣咗分又點吖，呢嗱，署方尋日公開首季成績表，有承建商喺一季之內被扣足二十四分，署方竟然唔發警告信，將佢放生。機電署講到明，呢個扣分制唔係法律所規定，只不過係署方嘅一項監管措施喎。喂！早響吖，新制原來係一隻紙老虎，只係屬於冇法定約束力嘅行政手段，用嚟嚇鬼就得！

至於所謂季度報告都係得啖笑，只係列出曾經被機電署巡查五次以上嘅承建商表現結果，但市民冇辦法監察規模細但表現差嘅承建商，而且扣分有效期只係得十二個月，咁即係話，就算犯咗錯，十二個月之後就可以乜事都冇。

仲有呀，機電署亦冇交代喺乜嘢情況之下，將表現差嘅承建商交紀律審裁委員會聆訊，變相就係放生表現差嘅承建商。有立法會議員直斥，公開扣分制方向係正確，但罰則模糊，如果署方人員執行散漫，隨時會淪為無牙老虎「明收實放」。

咁就大劑嘞，機電署出名散漫到冇朋友，向來踢一腳至肯郁一郁，申訴署踢爆該署喺○五至○八年間，每年有逾萬五部升降機遲交年檢證明書，但機電署幾年來只係發出過兩封催促檢查通知書。

機電署為咗表示有做過嘢，今年八個月內竟然狂發三百幾封通知書。咁就當然唔係以前啲承建商做得特別好啦，而係之前機電署監管得特別差，隻眼開隻眼閉咋！

叮佢個鎯鎯，機電署做嘢得過且過，成個評級制度又形同虛設，小市民每日出入真係搵命博o架。機電署署長陳鴻祥，人命關天呀，切切實實做足工夫監管升降機承建商得唔得？唔通真係要有人命傷亡至知驚！