小白觀點

殖民地政府老奸巨猾

灣仔繁忙要道爆水管，令告士打道變成大運河，好多乘客要澗水萬里長征返工，真係多得佢唔少。

好多上班一族平時節衣縮食坐巴士，將成副身家着晒上身，行頭十足，對鞋來頭唔係嘢小㗎，隨時係英國皇家御用造鞋師傅嘅大作，打工仔「見鞋浸水」，慘過「見財化水」！

巴士公司為咗提高服務水平，應該提供膠袋畀乘客包腳，每個徵費五十蚊，大把人要呀。

聽講話呢條鹹水管嘅年齡，老過好多大學畢業生，足足有二十三年歷史，咁即係話係前殖民地政府埋落㗎啦！英國人埋地雷就聽得多啫，連水雷都埋到遍及港九，真係老奸巨猾！

網址：www.sunsiupak.blogspot.com

網友觀點…

Calvin

喺巴士上面放定救生艇安全啲喎，如果唔係沖落海就大劑咯！

呂奇

不如環保署唔好再研究乜嘢電動車啦，搵鬼要咩，實際些少，研發水陸兩用車啦！

阿恆

政府一定有心㗎啦，計到咁盡，爆水管水浸街先安樂，成日闊佬懶理左推右卸。

波姐

政府收收埋埋咁多稅，請人去換吓水管都唔做，仲要搞到咁塞車，都唔知交稅嚟做乜！

阿里士多

早知係咁，根本唔使花咁多錢起泳池啦，東亞運游泳項目直頭搬去條街度咪得囉！

sue

真係好過分，點解可以容許一年爆四次！仲要每次都咁大鑊，封晒條路，啲人點返工呀！

Wing Lok

都算爆得啱時機喎，若果喺開學嗰日爆，班學生仔都唔知點算。

費凸拿

覆佢個震機呀！冇嘢呀，三年爆五鑊，你估車胎咩！

阿豪觀點

大條藉口推環保大業

二十三歲嘅人，有啲已讀完大學，成為社會棟樑；如果係一條地下水管嘅話，就只有等待爆裂嘅命運。

話時話，告士打道爆鑊杰嘅，冇錯令到市民好唔方便，但呢件事對環保大業嚟講，絕對係百利而無一害。

大家不妨諗諗，呢條咁繁忙嘅馬路，停用一日之後，有冇死人冧樓吖？冇吖嘛！地球咪又係繼續轉。咁即係話，呢條路其實可以間歇性封閉啦。當局咪曾經建議禁止歐盟三期或以下嘅商業車輛進入旺角、中環、銅鑼灣等繁忙地區嘅，計我話不如索性封晒佢唔畀車入仲好啦！一條殘舊水管，換你一個藍天白雲，賺咗！至於政府識唔識打呢張環保牌，就睇佢哋嘅政治智慧喇！

網址：www.lukchiho.blogspot.com