今個月係農曆七月，唔知係咪驚啲牛鬼蛇神出晒嚟，就算有「三耳四眼」嘅新任社會福利署署長聶德權都自知未必頂得住，所以尋日到訪屯門區議會前先拜「地主」打定招呼。當然唔係講緊拜神啦，而係預早拜會人稱新界大地主嘅鄉議局主席劉皇發。
聶德權好識做，上禮拜先撥個輪知會身兼區議會主席嘅發叔，發叔仲毫不吝嗇咁喺電話中提攜吓啲後輩。據聞發叔叫佢跟緊啲濫用綜援個案，話依家申領綜援無王管，浪費公帑之餘，仲令真正有需要嘅人得唔到幫助。咁啱得咁蹺，發叔呢個睇法同尋日區議會同事發表嘅意見一樣，啲議員發言溫順過綿羊，聶德權無風無浪過一關。都話發叔唔會點條黑路佢行㗎啦！
正生落戶梅窩嘅問題搞到發叔頭都大埋，忙於化解正生同梅窩居民之間嘅矛盾之際，近期又爆出正生投資醜聞，兼且有八成學生領取綜援交學費，咁點樣說服梅窩居民呢？所以佢叫聶德權跟緊啲綜援申請亦非冇道理。
廉署正調查正生，發叔話即使廉署唔公布調查結果，政府最終都要有個定案，係咪堅持要正生落戶梅窩。但無論結果係點，佢都質疑：「正生咁多問號，係咪仲堅持要落戶梅窩呢？」