公立醫院近排接連發生多宗醫療事故，「怪醫」梁家騮作為立法會醫學界代表，自己又係醫生，難免要為同行辯護吓。
怪醫喺電台話經人手做嘅嘢，做成千上萬次點都有可能出錯，所以唔需要經人手嘅，醫院都盡量唔經人手。而且醫生好講經驗，依家公立醫院每日都會由唔同級別嘅醫生巡房，盡量避免事故發生。
電台主持問佢有冇發生過醫療事故，佢好坦白咁話：「我自己梗係醫死過人啦！」而且醫生多數會買十萬至三十萬蚊不等嘅專業責任保險，如果醫生唔出錯嘅話，就唔使買啦！對於呢啲令人遺憾嘅事，佢話會檢討做錯啲乜，日後一定唔會再犯。
佢仲話啲前輩講過，其實每個醫生嘅招牌下面都有幽靈托住，有個人見到位醫生個招牌下面冇鬼就去幫襯，點知嗰個人就變成第一隻，事關個醫生太新喎！唔通大家睇醫生前，都要用陰陽眼睇睇個招牌先？