話說前日告士打道發生爆水管意外，甘威又係第一時間仆咗去現場跟進事件，期間仲學埋啲騎呢電視新聞主播咁，戴晒安全帽同螢光工程外套接受現場記者訪問，大鬧水務署同有關部門缺乏協調，再次畀佢出到位。

以一敵六 未打先輸

尋日佢諗住再下一城，約晒涉及爆水管事件嘅五大部門，即水務署、運輸署、路政署、環保署同警務處，雲集喺佢嘅議員辦事處開會，然後再向記者省多有關部門一次。點知喺原定開會時間約半粒鐘前，佢突然收到水務署署長馬利德電話，話該署決定唔會派人嚟同佢開會，並且已經叫埋其他部門都唔好嚟，要開就嚟水務署同佢開，擺明係要反客為主。

甘威去到水務署時，再發現自己中咗天仙局，原來馬利德早喺call佢嚟開會前，已經緊急召集咗另外六名保皇黨立法會議員同區議員到場撐自己，甘威以一敵六，未開打已經輸咗一半。

嗱！甘威平日係咁截人胡，點知今次就畀政府玩番轉頭，反截番佢嘅胡，名副其實係剃人頭者、人亦剃其頭！

由攞彩變咗畀人剃頭，甘威事後發晒爛渣，炮轟水務署唔單止言而無信甩底爽約，仲涉嫌阻撓其他部門同佢開會，妨礙立法會議員執行正常工作。佢揚言會去信馬利德嘅老闆發展局局長林鄭月娥同公務員事務局局長俞宗怡投訴事件，仲話會將事件提上白鴿黨黨團討論，研究喺立法會十月復會後跟進。