太一叮思疑，有見經濟疲弱，而特區衙門又冇乜振經濟保就業嘅板斧，於是靈機一觸，繼經機會「拆招牌保就業」後，又諗出石破天驚嘅「爆水管創就業」。嗱嗱嗱，元朗大棠路禮修村幾日前先爆完一鑊，灣仔入境事務大樓對開告士打道尋日又爆到一塌糊塗，而且係同一水管第四次爆裂。全稱「水皮服務署」嘅水務署話，香港爆水管嘅次數已由○五至○六年嘅一千五百幾宗升到○七至○八年嘅一千八百幾宗，創出平均一日五爆嘅佳績，爆到啲鹹水淡水流啊流，成為水喉佬嘅就業喜訊。

只不過，啲水喉佬就話有工開啫，啲運輸業、職業司機同趕返工嘅小市民就慘情咯。就攞尋日嗰單爆水管事件嚟講，爆正返工時間，搞到灣仔告士打道東行全線癱瘓，條車龍一度塞到西隧九龍入口，十九條巴士線必須改道，大批市民逼入港鐵，大批乘客落地步行，拉得裙嚟又褲甩，直頭走難咁款。

見到啲水管左爆右爆、爆完再爆，啲專家就狠狠踢爆，原來香港啲地下水管大部分係生鐵造嘅，使用壽命只有二十五年，但係家陣四成半水管用咗超過三十年。而啲官又死蛇爛鱔懶得更換，再加上車多路窄頻頻施壓，日壓夜壓之下，真係唔爆就奇。

至於告士打道條水管連爆四響，原來又係官老爺嘅傑作。事關水皮服務署每次爆喉都淨係整番裂痕十呎內嗰截，但係十呎外嘅水管被沖到沙石流失就一於少理，結果醫得頭嚟唔醫得腳，前面爆完後面爆，呢頭爆完嗰頭爆，卒之一爆再爆，長爆長有囉。

叮！水管老化，最治本嘅做法本來就係換過晒啲舊水管。水皮服務署一九九九年已經話要用一百一十四億公帑更換老爺水管，可惜講就天下無敵，做就無能為力，竟然要二○一五年先有望完工，仲話已經「加快」咗喎。太一叮懷疑，工程速度慢到咁，完工之後又要由頭換過，因為當初換嘅水管已經又變得老化。

換管工程慢過蟻躝，全港水管遍地開花，成為香港地嘅獨特景觀，香江變噴泉。水務署署長馬利德，太一叮畀你兩個選擇，一係就拿拿臨換過晒啲老爺水管，一係就將計就計，索性加埋潑水活動，力谷旅遊。而你老兄咯喎，其實好應該企喺爆管現場表演娛賓，到時唔使太一叮出手，啲水柱已經可以沖爆你個鎯鎯，真係大吸旅客，利港利民o架，諗諗佢呀。