尋日灣仔告士打道爆水管，造成大塞車，當時喺北角站見到中華廠商聯合會會長尹德勝喺人群中畀人半推半挾咁行入車廂，一問之下，原來佢約咗新任工業貿易署署長關錫寧喺中環食飯，廠商會秘書處通知佢中環大塞車，搭港鐵最穩陣。
爆水管搞到有車都無用武之地，尹會長惟有嘥啲腳骨力，同啲打工仔一齊逼港鐵，但佢算彩數唔錯，一入車就搵到位坐，唔使「un」足全程。佢中午十二點四十八分至上到北角往上環方向嘅列車，約咗關錫寧一點鐘喺中環見面，時間相當緊迫，所以面部表情亦有啲掹緊。列車駛到中環站，時間係十二點五十七分。嘩！如果想唔遲到，睇嚟佢要跑九秒九至得囉。
佢話工貿署係廠商會嘅對口部門，關錫寧新官上任，所以佢同廠商會高層自然要請食飯啦，希望雙方以後保持緊密溝通嘛。