咁啱尋日喺金鐘一間中菜廳撞到三名女高官同枱密斟，佢哋分別係返中環美利大廈嘅商務及經濟發展局局長Rita劉吳惠蘭、嚟自灣仔稅務大樓嘅環境局常秘兼環保署署長王倩儀，同埋喺北角渣華道返工嘅地政總署署長譚贛蘭，莫非政府嚟緊有牽涉該三大政策範疇嘅措施推出，所以佢哋要坐埋一齊共商對策？
非也！Rita話只係朋友敍吓舊，唔係有乜特別嘢傾。
其實Rita除咗係太極高手，平時仲有練習書法，但佢話書法老師高雲州去年中風，書法班於是停咗，佢之前個個禮拜都會勤力習字交功課，依家冇咗老師喺課堂上督促指導，難免冇咁勤力，擔心書法功力會退步。
好彩佢仲有另一個減壓方法，就係學咗十幾年嘅吳家太極拳嘞，依家就算幾忙幾多嘢做，每日佢都會花二十分鐘耍太極，每次都會打晒一百零八式先收手，絕不偷工減料。佢話耍太極要耍得好，記緊要心神合一，切忌貪快，愈耍愈急就適得其反喎！