呢個暑假毒氣沖天，校園驗毒計劃早前鬧得沸騰，主事官員教育局局長孫明揚咁啱請假三個禮拜，避開暴風眼。
孫公休假期間去咗韓國首爾狂歡四日，同行仲有孫太鍾小芬同孫太嘅閨中密友。尋日孫公第一日返工，中午約埋孫太去香港會撐枱腳。孫太爆料話，孫公喺首爾日日食完早餐就話返房休息，下晝同夜晚都一樣，四日嚟幾乎未離開過酒店半步，激到佢紮紮跳，而孫公嘅理由係：要睇文件。
山長水遠去到首爾，孫公竟然冷落嬌妻，自己匿埋喺酒店？原來佢喺首爾閉關，係要執行「標殺令」！孫公自爆平時公務繁重，根本無暇處理如雪片飄至嘅各式各樣月結單，空有殺校大權，面對堆積如山嘅帳單，卻冇「Kill Bill」之力，所以難得離開香港，擺脫公務纏擾，一於匿埋全程Kill Bill，不論已過期定係未到期嘅月結單，總之多啲嚟，密啲Kill，絕冇撻Q！