婦協會展騷上禮拜五晚曲終人散，當晚最大陣仗嘅表演要數打大鼓環節。有份演出嘅全國人大常委范徐麗泰話，老師要求佢哋做十款動作，包括打完自己個鼓再打側面隊友個鼓，可惜綵排時「蝦碌」百出，頻頻同隔籬撞棍。
范太話當晚共有十二位阿太打大鼓，咪睇各人棍起棍落，節奏感十足，原來事前各人根本唔識打鼓，婦協即時提供七堂速成班，但范太因為公務繁忙，最終只上到三堂，好彩佢領悟力高，上唔足堂都學識晒所有動作，上台全無失手。
蔣麗芸（Ann）都話估唔到阿太們打起鼓嚟棍棍有力，氣勢不遜男士，仲爆料話當晚各人心情緊張，即使大會預備咗豐富晚宴，都冇乜點食，勒緊肚皮表演。
阿Ann打完鼓後，急急返後台換套大戲裝，反串做梁山伯，並以黃梅調唱出《梁山伯與祝英台》，女扮男裝真係佢人生當中一大嘗試。