話說立法會議員劉慧卿前幾日特登去信保安局局長李少光，狂數佢嘅政治助理盧奕基十問九唔知，盧奕基之後話會回覆卿姐，但隔咗幾日一啲聲氣都冇。尋日佢喺大埔出席「禁毒天使」計劃活動啟動禮，梗係畀記者捉住講吓最新發展啦！
有記者問盧奕基點睇卿姐批評佢唔熟自己局嘅政策，同埋究竟佢喺禁毒政策內扮演乜嘢角色時，佢居然無厘頭咁回應禁毒係保安局其中一項工作，然後無啦啦話唔係單靠執法，跟住仲扯到社署頭上，話佢哋都可以協助，完全同啲問題毫無關係，原來佢除咗十問九唔知，仲係九唔搭八！講講吓佢先話作為保安局一員，職責係協助宣傳、教育同埋執法，雖然內容近咗少少，但都係同正題差十萬八千里遠。
至於有冇回信畀卿姐，盧奕基話封信係畀李少光，唔係畀佢，所以唔係由佢嚟回覆，而係由保安局辦公室處理，以佢所知封信依家仲寫緊，仲未發出去。
何解寫封信都要咁耐？佢反應好快咁話二十六號發生，尋日只不過係三十一號，唔認同係隔咗好耐都未覆喎！吖！計日子就答得咁清楚！