IT豪話用電子書其實有好多好處，既可加強學生嘅互動性，又可畀多啲空間老師選擇佢哋認為最適合嘅教材，而學生又可以唔使孭咁多書返學，一舉幾得。

政策搖擺不定乏資源

但佢都忍唔住發炮，話唔知政府過去一年做乜，搞電子書搞咁耐，仲係乜聲氣都冇。佢話明白要推動電子書係有阻力，例如書商會擔心版權問題等，但咁耐都睇唔到書商同政府有默契，覺得政府係「一見到有阻力就停咗喺度」，實在唔應該；又指作為政府冇理由咁搖擺不定，如果決定咗係要行呢一條路，就應該好好哋放多啲資源落去做，佢必定會喺立法會度跟進。

相信好多家長都好有同感，若果政府遇到阻力就縮，咁點會搞得成吖！雖然IT豪冇點名話係邊啲高官有咁嘅反應，但電子書係教育局副局長陳維安負責嘅，咁就呼之欲出啦！

另一位議員@馮檢基都讚電子書嘅概念好好，雖然佢囝囝讀直資學校，學費本身包埋書簿習作，佢哋唔需要為買書而煩惱，但佢認為電子書係大勢所趨，應該快啲推行。

有對孖仔讀中學嘅袋巾傑就認為就算未搞電子書，政府都可以考慮吓外國嘅做法，叫啲師兄姐畀啲書班師弟妹，慳錢之餘，又唔使撲書撲得咁辛苦，兼可以促進大家嘅感情，一家便宜幾家着。不過，呢個方法可能要等到啲書商唔再改版先行得通嘞！