小白觀點：日資百貨公司怪談

呢個世界真係無奇不有，小白老弟有個朋友乜小姐，喺一間已經執笠既日資百貨做咗幾十年，講番當年喺鬼月啱啱頭嗰幾日返工既經歷，到依家仲猶有餘悸。

話說佢嗰日早咗返工，公司四周人影都冇個，只係見前面收銀台有個女同事踎喺地下搞呢搞路。佢諗住同前輩講聲Hi啦，但對方唔知係聽唔到定臭串，完全冇理會。唔睬就罷啦，乜小姐返番自己崗位繼續做嘢。直到食晏時，佢好奇咁問同事，因乜事收銀員大熱天時仲着咁厚嘅制服？呢個時候同事當堂面青，話佢聽嗰套係已經冇用咗幾年嘅冬季制服，而收銀台嗰個位，之前有個女收銀員因為煤氣洩漏發生爆炸而死咗，個職號就係乜小姐用緊嗰個。

網友觀點...X）...

（小鬼）

都咪話唔信邪，夜晚出街心都寒寒哋，烈士出嚟操兵鬆一鬆骨有咩出奇呀。

（洪爺）

呢個政府認真大鑊，移走咗烈士石碑，唔整番好佢，又冇香火供奉，搞到亡魂無法好好安息，走晒出嚟，真係冤孽。

（波姐）

香港政府移走個石碑，搞到多咗個猛鬼地點，係咪用嚟拍《怪談》o架？

（珠女）

依家盂蘭節都少見咗人燒街衣啦，祖先鬼靈邊有啖好食吖，個個出嚟行行企企，所以見到Feel到都唔奇。

網址：www.sunsiupak.blogspot.com

阿豪觀點：冤有頭債有主

真係奇哉怪也，以前就話農曆新年、聖誕節等大時大節至有應節新聞啫，估唔到家陣連盂蘭節啲新聞都咁應節。元朗屏山達德公所最近傳出鬧鬼新聞，有村民話見到抗英烈士遊魂喺村入面練習步操，都咪話唔得人驚！

中秋節係提醒大家一家團聚幾咁幸福，其實盂蘭節都係一樣—你一定要對先人好啲，否則佢哋實唔肯過你。

呢件事亦都證明下面資訊都幾發達。烈士們睇新聞知道，如果唔係啲公公婆婆走出來抗爭，依家連攞生果金可能都要查過三代至得咯。不過話時話，冤有頭債有主，你哋要操兵遊行抗議，就算唔去上亞厘畢道，都至少去發展局局長官邸啦，唔好嚇親啲村民嘛！

網友觀點...X）...

（神婆）

咪再講呀，突然間陰風陣陣添……你話聖誕就有應節新聞啫，依家連盂蘭節都嚟料，啋啋啋……

（李察）

年年盂蘭節派米都曬暈幾個老人家啦，仲講話照顧死人，嘥氣！

（lok）

學生開學前，使唔使去鵝頸橋打小人呢？

（廖尚恒）

真係唔講唔知有呢班抗英烈士呀，畀我係佢哋都要出嚟操兵抗議啦。不過冤有頭債有主，你哋都係操去禮賓府罷啦！

網址：www.sunsiupak.blogspot.com

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。