話口未完，東亞運主要場地將軍澳運動場就爆咗個嘞。呢個場今年五月至啟用，點知已經千瘡百孔，有啲跑道拱起一個小山坡，最嚴重嘅表面竟然拱起咗二點五厘米。呢條凹凸不平嘅跑道真係名副其實嘅地雷陣，好彩世界飛人保特唔會參加東亞運咋，如果唔係隨時仆落地，創下個人最慢嘅紀錄添。

康文署又喺度死撐話，不平嘅地方只涉及跑道表層橡膠，只需要幾個星期工夫清除以及重鋪就可以再用，相信對東亞運冇影響。

問題係香港田徑總會尋日舉行嘅田徑錦標賽，已經要因此延期到十一月舉行。今日就話呢度拱啫，難保後日又嗰度凸起o架，如果到東亞運開賽前一日至再發現有地雷陣，唔通又要延期咩？

叮佢個鎯鎯，將軍澳運動場向來都係出晒名甩甩漏漏，就算避得過地雷，亦避唔過跑道上嘅積水。本報記者去睇過，跑道四周留低好多水浸痕迹，田賽區域嘅跳高以及撐竿跳跑道，仲有副場跑道以及練習場多個地點，亦都出現水浸情況。就算撐竿跳女王伊仙芭耶娃嚟到，都跣到攤攤腰o架！

至於其他康文署轄下嘅比賽場地，都唔係好得好多o架咋。嗱嗱嗱，前排咪搞咗一個全港運動會，測試一下東亞運舉辦能力嘅，已經可以見到大把蝦碌嘢。西區公園體育館竟然漏水，外面落大雨，裏面落細雨，要喺場內擺膠桶陣至得。

有立法會議員直斥康文署驗收馬虎，當局應立即委託獨立機構覆檢所有場地，免得呢啲豆腐渣工程成為國際笑柄。

叮佢個鎯鎯，澳門咁細嘅地方，上屆搞東亞運搞到有聲有色，但一落喺香港呢班懶官手上，即刻醜態百出。講到底，完全係因為當局由始至終都求求其其，宣傳工作更加係少之又少，如果唔係久唔久爆出咁多蝦碌嘢，好多小市民都唔知原來年底有個大型運動會喺香港舉行呀！

記得去年京奧聖火喺香港傳遞時萬人空巷，但係睇吓日前喺鬧市進行嘅火炬傳遞活動又點呢？旁觀市民得個小貓三四隻，連示威者都唔吼，據警方公布嘅數字，圍觀市民數目唔夠一萬人。

當局成日用We are ready宣傳東亞運已經準備就緒，但好明顯至今仲未 Ready，周達明就話拍拍屁股走咗去，馮程淑儀新官上任，好應該快啲搞掂上手剩落嘅蘇州屎呀，千祈唔好令香港人喺全世界觀眾面前出醜呀，叮！