有村民話以前有二十幾個青年喺達德學校玩碟仙時撞邪，睇嚟好猛喎！大輝表示曾經喺嗰度讀過兩年小學，由於位處半山，佢每日返學放學都要經過竹林，而呢段路就特別令佢「印象深刻」。點解？原來嗰度係停屍嘅地方，凡村內有鄉親父老過身，都會喺嗰度搞公祭。

佢話印象中幾乎每個禮拜都會有長輩過身，朝早陽光充沛時行過都仲好啲，放學已經係黃昏，竹影幢幢再加上做法事嘅「啲打」聲，都咪話唔驚，所以佢每次經過竹林都雞咁腳走人。有時人有三急要喺竹林解決，佢「方便」前會講「唔該借借」，「方便」後就講「唔好意思打攪晒」，務求各位長輩唔好以為佢冇禮貌而「指教」佢。

雖然呢啲係陳年舊事，達德學校依家已經荒廢，但大輝話細個時天真唔識驚，依家見識雖然多咗，可能唔敢再行經屏山嘅竹林嘞。睇嚟佢真係提起鬼校仲心慌慌喎！