喺依家呢個時代，有幾多對夫妻可以同偕白首相敬如賓之餘，仲係咁恩愛嘅呢？所以港交所前主席Charles李業廣（圖）同太太呢對夫妻，真係好值得人羨慕。點解咁講？早幾日喺中環撞到Charles，呢排個市有番啲起色，梗係捉住問吓佢對後市點睇啦！但佢對個大巿走向似乎提唔起興趣，冷淡咁話︰「我冇睇個巿呀！因為我退咗休喇！」
之不過，一講起佢同太太坐郵輪再度蜜月，佢又即時生猛晒，仲話︰「我哋啱啱坐完船返嚟，今次去咗三個禮拜，去地中海同歐洲幾個地方玩，真係好Sweet，太太都好滿意個旅程。」見佢講到眉飛色舞，好明顯呢個Trip一定玩得好開心。
