肥亨尋日喺大氣電波清楚講明自己唔係海嘯逃兵，佢笑言：「我邊有咁叻可以預視到金融海嘯吖，一切都係神嘅旨意。」佢憶述當時由發現腦瘤到離開官場，心情其實好複雜，作為官員，佢對香港有一份承擔，但如果由得個瘤喺度唔處理，一直喺壓力下工作，又冇時間做運動，最終可能會腦中風，佢衡量過之後覺得命仔要緊，所以毅然辭職。

總結六年為官經驗，佢得出兩個字—「用心」，仲話：「市民嘅眼睛係雪亮嘅，你用心去服務，一定會得到認同……做嘢嘅過程唔可以敷衍，唔係做show！」

因為肥亨喺大氣電波提起去台灣，有說當時外界揣測佢在位期間頻頻秘密訪台而被迫辭職，事後問番佢，佢斬釘截鐵咁話：「無稽之談！」佢話，當時係獲特首批准訪台，仲笑指自己先係首位以非官方身份訪台嘅香港高官。即係比其他人行前咗一步添。