新鴻基地產非執行董事郭炳湘同太太李天穎尋日去到灣仔鵝頸橋橋底，出席婦協郭得勝服務中心嘅動土儀式。郭炳湘心情靚爆，大熱天時，即使主禮場地冇冷氣，嘉賓焗到流晒汗，着住老西嘅佢依然笑足全場；太太則寸步不離黐實老公，更因為要追住老公，搞到差啲跌倒，好彩佢反應夠快，一手扶實老公強壯嘅臂彎，至可以安然無恙。
郭炳湘睇嚟有備而嚟，幾乎有問必答，就算有人問佢幾時重返新地做主席，佢都好坦白咁話：「呢個唔知喎，睇情況啦！」問到健康問題，佢就答得好親切：「問我健康狀況係點？我諗點都唔差過你噃！」咁新地會唔會勾出九肚山塊地皮呀？佢話都會試吓嘅。
今次婦協嘅翻新工程，係婦協主席林貝聿嘉舊年喺一個場合主動同郭炳湘提出而起，郭炳湘聽後返屋企同媽媽鄺肖卿商量，決定由郭得勝基金撥出一千萬大元，更承諾參與設計同施工，預計工程一年後完工，並將重新命名為香港婦協郭得勝服務中心。