本來公共醫療醫生協會、前線醫生聯盟同顧問醫生協會三個工會約咗食物及衞生局局長周一鑊今晚食飯，諗住直接喺局長面前怒插醫管局漠視員工意見。點知喺飯局前夕，事件就出現翻天覆地嘅轉變。

不滿慘淪政治花瓶

醫管局搞出個大頭佛，尋日出動到CEO蘇利民親自打電話畀公共醫療醫生協會會長何栢良，低聲下氣道歉之餘，仲即刻「收回成命」，轉晒口風話醫生唔簽同意書都唔使炒，簽名限期亦可延遲咁話。

何醫生話尋日朝早剪剪吓頭髮就收到蘇利民嘅「和頭call」，承認管理層嘅處理手法同溝通技巧都有問題，仲開聲挽留劈咗炮嘅醫生代表，有咩事唔啱傾到啱。

既然蘇利民呢次肯跪低認衰，何醫生同其他代表都唔想傷和氣，好大機會繼續留任。何醫生又話醫生唔係唔肯減薪，但○二年同○四年兩次減薪時，醫管局都係等立法會通過咗公務員減薪方案，再諮詢埋員工意見，先叫佢哋簽同意書；今次明明立法會要十月先傾公務員減薪，醫管局就要醫生喺九月二十五號之前簽同意書，變相擺醫生上枱，成為政府說服公務員接受減薪嘅籌碼。佢哋今次反應咁激，係不滿有人當全體醫生一人一票選出嚟嘅醫生代表係「政治花瓶」，仲惡言相向啫！

至於疑似恐嚇風波「元兇」張偉麟，據講管理層亦唔再畀佢插手，換過第二個去應付班醫生。何醫生話其實尋日仲收到另一個「補飛」電話。對方係邊個？大家都應該估到，佢都唔多講嘞！