偶像雜誌代替教科書

聽聞今年因為o靚模寫真集太好賣，加印又加印，搞到啲教科書被迫讓路，好似話好多都趕唔切出版。既然花咗個幾月時間做援交妹，先至買到一個名牌XV書包返學，一心諗住可以砌低隔籬嗰個Angelina.Z，冇理由任得個書包空蕩蕩，總要搵啲嘢填滿佢至係㗎！咪塞晒嗰啲乜嘢棒棒糖、茄輪海嘅偶像雜誌海報落去囉，成個書包當堂挺晒。

至於班男生，就要將之前書展買落嘅人形攬枕帶定返學嘞，上堂悶悶哋攬吓又得，見到有邊個冇返學，即刻拎出嚟放喺佢個位又得，得咗！同學仔好應該發揮鄰里守望相助嘅高尚情操，如果唔係日後索咗K要驗尿，搵鬼幫你掉包咩！

網址：www.sunsiupak.blogspot.com

帶定乾淨尿看門口

唔經唔覺又到開學，大家唔好以為時下學生哥對開學大日子闊佬懶理，查實佢哋不知幾有準備。最令豪伯我老懷安慰嘅係網友嘅商業觸覺敏銳，識得帶定幾篤乾淨尿返學看門口，從小就滿腦生意經，第時唔怕出社會同人競爭。但係做生意商譽最緊要，千祈咪賣受污染尿液喎！

嫌賣尿唔衞生，咁不如轉行賣口罩啦，家陣日日都有咁多人中招，諗得過喎！

美中不足嘅係，竟然一個二個學生都話要帶o靚模寫真返學，等豪伯話過你哋知，學業為重，點可以咁懶齋睇圖畫唔睇文字o架！要睇就睇才女歌手嘅愛情小說，邊睇邊搵錯字，好過去參加天王補習班，攞A冇難度呀！

網址：www.lukchiho.blogspot.com