北區醫院一名護士長錯將止痛嘅口服嗎啡糖漿當生理鹽水，幫一名癌症女病人注射，畀家人質疑至發現犯錯，病人注射後七日死亡。更離奇嘅係，院方竟然秘而不宣，接到本報查詢至「自爆」有人出錯，但否認病人因為注射嗎啡糖漿致命，仲話已經「訓斥」咗涉事嘅護士。

食物及衞生局副局長梁卓偉尋日回應話，呢次個案表面上有人為疏忽，管理層有一定責任，日後要完善風險管理系統，協助前線人員避免犯錯。咦，乜啲官腔咁熟口熟面嘅？其實，呢番說話佢老頂食衞局局長周一嶽已經講過N咁多次，大家早就耳熟能詳。

叮！阿媽係女人仲使你講？打錯針梗係人為錯誤啦，唔通支針畀人落降頭，識周圍搵人拮咩。據死者個仔話，佢媽咪當時打完抗生素，本應再注射生理鹽水，點知有個護士長急急腳行埋嚟，攞起附近嘅嗎啡糖漿就幫病人打，百分之一百係人為錯誤啦！問題係，院方明知出咗錯仲想隱瞞，冇心認錯，唔怪之得愈錯愈離譜啦。

話口未完，沙田威爾斯醫院又打錯針，一名護士張冠李戴，冇核對手帶資料，錯誤為一名嬰兒注射另一名嬰兒用嘅抗生素。

仲有，聯合醫院一名配藥員喺工作地點自殺身亡，懷疑死控工作壓力大及不公平管理，但院方神神秘秘，又冇清楚解釋死因，更冇向外公布事件，都唔知佢哋究竟想隱瞞乜嘢。

叮！醫管局成日話增加資訊透明度，又話加強程序監控減少事故，但係冇一樣做得到。呢嗱，為防止派錯藥、打錯針，醫管局整咗套「三核五對」程序，攞藥要經過三個步驟，每個步驟要核對五項資料。可惜講就一套套，做起嚟就一鑊泡，部分前線員工根本當程序透明。

四月初，廣華醫院有護士拎錯藥，將鎮靜劑當嗎啡幫老婆婆注射，搞到病人神志不清，喺家人追問之下，醫院至死死氣咁認衰，涉事嘅護士承認自己冇跟足程序做嘢。

伊利沙伯醫院今個月發生護士冇檢查有效期，幫五名嬰兒注射過期卡介苗針劑嘅醜聞；市民驚魂未定，今次北區醫院又爆出糖漿當鹽水嘅醜聞，仲懷疑搞出人命添。有程序變咗冇程序，有事又可以扮冇事，咁牙煙嘅醫院，唔出事至奇啦。

當局話已經搵澳洲專家來港評核醫院運作同風險管理喎，不過就強調咁做同近期連串醫療事故無關。唉，真係此地無銀三百両，如果公立醫院唔係頻頻出事，又何必多此一舉請洋專家來評估呀！其實唔使做咁多騷嘅，當局唔徹底改變醫管局「上肥下瘦」嘅畸形架構，唔增加前線資源，唔加強管理層問責，再做一百次檢討、定一百套程序、請一百個洋專家都止唔到咳啦，咪盞浪費公帑。叮！