差人查房打咗至講

元朗馬田村有兩兄弟三更半夜畀人爆門入屋，唔知乜頭乜路，畀人打到豬頭咁嘅樣，後尾先至知道嗰班係如假包換嘅差人，懷疑有人擺烏龍爆錯門。又唔怪得差人嘅，你知啦，佢哋支槍例必虛發，正所謂「官府在遠，拳頭在近」，差人查房，打咗至講吖嘛。

不過事後兩兄弟怒斥差人同賊冇分別，就有啲無知咯。其實要分辨邊個係兵邊個係賊，真係話都冇咁易。首先，賊佬一般行家術語都會問：「要錢定要命？」好少會粒聲唔出就郁手。如果仲未百分百確定，咁就要善用傻強原理—「如果有一個人好唔專心咁做自己嘢，而佢又望住你，咁佢就係警察。」

小市民為求自保，與其要日夜提防惡警爆門，不如諗諗方法，放定電話簿、錘仔喺屋企恭迎佢哋啦！

網友回應

榮叔

防賊仔都未夠，依家仲要防埋差人，攞正牌揸槍入屋，我哋小市民可以做到啲咩吖。

安哥

喺屋企裝定機關，一有人爆門就撒網包鬼住入侵者，是警是賊都捉咗先。

偉強

屋企都要加強防盜同保險至得，惡警收錯料爆錯門都得，遲吓炸埋我間屋點算呀。

kitkit

屋企每個角落裝晒閉路電視兼錄影，拍低晒惡警所作所為，上到庭都有證據。

Steve

好市民當賊辦，惡警仲郁手打人，咁同爛仔有咩分別，都係去學番兩手功夫傍吓身。

小肥

不如屋企整番個地下防空洞，就算差人爆門，都可以有地方匿吖！

kenix

我哋交咁多稅就係養呢班差人爆自己道門，咩世界呀！

Gary Lui

有咩坐低慢慢講，傾唔掂咪Call埋一哥一齊傾囉，使乜要動武呢？