白韞六尋日以一身便裝出席一個活動嘅開幕禮，個會場設有安檢系統，唔知係咪咁，佢被問起校園驗毒計劃時，好自然以安檢作比喻：「如果冇嘢嘅又何須怕畀人驗呢？」為咗表示自己真心支持，佢仲拉埋自己個仔落水，話唔介意阿仔都接受驗毒。其實，白處長管轄下咁多個出入境口岸都裝有安檢系統，接受安檢，對佢嚟講簡直係家常便飯，或者當局研究驗毒計劃時，都應該諗吓一啲創意辦法，令驗毒好似人哋過行李X光機或者係金屬探測器咁，咁就大家都輕鬆啦。

啱啱放假散心返嚟嘅白處長又話，家吓唔少青少年都有壞習慣，譬如濫藥、掛住上網打機等，佢好慶幸兒子細個冇呢啲問題。梗係啦，佢同太太管教仔女時配合得天衣無縫，一個做好人、一個做醜人，如果囝囝實在曳，仲會小施體罰添，喺佢哋嚴厲管教下，從事會計嘅囝囝事業有成，難怪佢咁開心啦。