時下新一代問題多多，百仁基金主席、恒基地產副主席李家傑尋日喺個分享會中話，今個暑假佢哋搞咗個企業參觀學習計劃，一係想幫時下青少年發掘自己未來有興趣嘅職業，二係眼見九十年代後出生嘅青少年，普遍都係冇動力、冇志向、冇恐懼感，好多匿埋喺屋企沉迷打機，做晒電車男，慘不忍睹，所以希望開拓佢哋嘅眼界。
佢話：「時下好多青少年只掛住打遊戲機，只識問屋企攞錢，完全冇養家觀念，如果唔立定志向，將來做乜呢？女都話仲可以嫁人，但男嘅都唔知點算！」佢仲引明代大儒王陽明嘅名句：「志不立，天下無可成之事。」
講講吓，佢又糾正年輕人搵工嘅心態：「好多人話內地人工低，又要捱，但內地發展潛力大，今日係咁啫，將來未必係咁，好似上海將來發展成金融中心，到時人工未必低過香港，但到時先至決定上去發展就已經太遲嘞！」