東亞運動會火炬傳遞尋日舉行，問到一手湊大東亞運嘅港協暨奧委會會長霍震霆擔唔擔心遲啲嘅賣飛表現，佢話香港人一向比較慢熱，相信遲啲東亞運嘅氣氛會慢慢升溫。立法會前議員蔡素玉尋日都有喺其中一個場地，佢認為現場政界人士唔多，都幾可惜。
霍公子尋日透露，內地話會派最強嘅團隊嚟港參賽，估計唔少金牌運動員參加賽事，所以佢並唔擔心將來賣飛成績，反而擔心部分賽事座位唔夠多，尤其排球、跳水呢啲熱門項目，可能會好快滿座。問到未來新抱、跳水王后郭晶晶會唔會嚟港時，霍公子笑笑口咁話佢係國家運動員，要問番國家體委先得。
雖然佢冇話郭晶晶會唔會嚟，但尋日一班青聯嘅成員就異口同聲話最想睇跳水項目，原因係「要支持未來副主席夫人吖嘛！」原來佢哋大開霍家長孫兼青聯副主席霍啟剛嘅玩笑。