城中好多名人參加嘅毅行者活動，今年十一月將以「為貧窮人對抗氣候變化」名義進行籌款，城市電訊（香港）主席「魔童」王維基都會參加，雖然今年佢係首次參加，但就希望打破大會嘅籌款紀錄，認真有野心。
魔童話自己係孱仔一名，以前好少做運動，近年先開始接觸長跑，每逢唔使公幹留港嘅日子，都會日日練跑至少十公里，去年佢挑戰全馬（馬拉松），好可惜跑唔足全程。今年參加毅行者前，仲特意向行過毅行者嘅老友、運輸及房屋局副局長邱誠武取經：「佢都行到，我冇理由唔得㗎！」
佢又透露，明年二月會去南極拍一套關於全球暖化嘅紀錄片，預計會喺二○一二年作全球播放。
