基層屢轟政府冷血

何喜華尋日出席一個電台節目時表示，煲呔曾隱形幾個月後，近期開始積極為施政報告做曝光騷，但佢劈頭就話今年施政報告唔會有派糖措施，理據何在呢？何認為或者有兩個原因，一係政府意識唔到問題，如貧富差距、經濟冇方向等；二係政府只識無為而治，唔到民怨沸騰都唔會積極改善。以港府嘅往績同煲呔曾「多做多錯、唔做唔錯」嘅管治心態，何喜華認定今次施政報告嘅思維都會以後者居多。

咁即係話，煲呔曾搞完一輪大龍鳳之後，最後都會還原基本步，乜都唔做，因為咁樣乜錯都冇！基層團體唔止一次批評政府冷血，何喜華都話過去嘅施政報告喺貧窮問題上一直交白卷，對經濟衰退危機感不足，創造就業又無方，今次施政報告又係唔做唔錯嘅話，香港人真係唔會等有啲人良心發現㗎。

政府高官成日用球隊成績嚟比喻政府表現，我哋不妨照辦煮碗，試諗吓煲呔曾呢個守門員喺球場上又係唔做唔錯嘅話，香港呢個龍門點守得住呀？睇怕佢早就畀人換走啦！

講完一大輪，何喜華再為基層鳴不平，話有個清潔女工每日做足十二個鐘，每個月都係得四五千蚊，未夠餬口，只能感嘆自己得一對手。唔知煲呔曾聽咗呢個女工嘅故事，會唔會郁一郁呢？