毒品調查科探員日前喺元朗馬田村採取行動，懷疑因為收錯風，三更半夜破門搜查六間民居，結果發現係流料。爆錯門擾人清夢都未算離譜，懷疑有探員變身「暴力刑警」，既無表露身份、亦冇出示搜查令，不問情由就嚟個「拳頭大逼供」。

一對兄弟報稱被狂毆五分鐘，叉頸、掌摑乜都出齊，有人更用被冚住個頭嚟打，做哥哥嘅被打到耳膜都穿埋。大批村民指摘警方濫用暴力，並且包圍現場，仲誓言要追究責任，事件差啲演變成警民衝突。

叮！警察有冇惡啲呀？似尋仇多過辦案噃。無啦啦破門入屋，解釋都冇句，冇講明身份就郁手打人，咪話無辜市民吖，就算係疑犯，對方又冇反抗，使唔使落咁重手？警方執法「指引」去晒邊吖？就算係內地，公安想阻止記者採訪，至多咪話懷疑酒店房間藏有毒品，都冇打人呀。

身為執法者，竟然被斥「仲衰過啲賊」，法治之區？講咩！警方涉嫌隨意破門，打人逼供都不特止，連最起碼嘅辦案程序都冇遵從，搜查令要等軍裝警員到場二十分鐘至攞出嚟、未有當事人陪同或確認就搜屋、明明有濫用暴力嫌疑但軍裝警員居然冇抄低涉案探員嘅資料。咁搞法，叫市民點相信投訴警察課會秉公處理佢哋嘅投訴吖？

據講，事發嗰陣有村民想報警，有人竟然話「差人做嘢，唔好多事」。其實，就算辦案都要講程序，唔可以亂嚟啩。更何況，依家差人做嘢直頭係成事不足，敗事有餘，鋪鋪大鑊噃。

呢嗱，上個月中警方為咗堵截非法賽車，竟然攞無辜市民做人肉路障，搞到多車連環相撞，幾乎搞出人命。更離譜嘅係，旺角警署一名偵緝警員居然喺警署認人房內先後非禮及強姦四名少女。有調查顯示，淫警事件發生之後，市民對警隊嘅滿意度急挫百分之八，創六年新低。

叮！警隊內部管理混亂，漏洞多多，除暴安良嘅罪惡剋星原來係淫魔，連最安全嘅警署都變埋強姦案犯罪現場，市民對警隊滿意度唔跌至奇。正如今次被打兩兄弟嘅父親話齋，「對警隊冇晒信心」。

醜聞好似水蛇春咁一鑊接一鑊，照計警方應該畀心機改善管理，提高執法能力，挽回市民信心至正路㗎。點知佢哋連本分都未做好，居然聲大夾惡要求逆市加薪，臉皮厚唔厚啲呀！再咁落去，邊個係兵，邊個係賊，睇怕都好難分得清咯！叮！