政府逼到中產發窮惡

就嚟又到農曆七月十四，每年盂蘭節例必有唔同嘅民間團體輪住派米，好多公公婆婆頂住烈日或者冒住風雨都要去拎番包。

冇辦法啦，呢個特衰政府連畀多些少生果金都要左度右度，鄰近地區澳門同埋台灣，一個現兜兜派錢，一個派消費券，香港人得個恨字，依家一年一度有包米喎，好過派幾張到喉唔到肺嘅長者醫療券多多聲啦，老人家除咗係為攞個意頭之餘，一包米又係真真正正可以醫飽肚，梗係搏埋條老命都要排啦。

小白老弟奉勸一句，聽講依家好多中產西裝友都去食物銀行攞嘢食，因住佢哋餓到發慌，連盂蘭節包米都唔放過，佢哋有氣有力，畀政府逼到發窮惡時，唔係人咁品，老人家今年輪米時，記住要小心一啲呀。

網友回應......

Connie Ng

政府應該安排派米活動在室內有冷氣設施的社區會堂進行，既可令公公婆婆不需日曬雨淋，而且容易控制秩序。

蟲仔

以前派嗰袋米好大袋㗎，排隊都抵啲吖，依家得好細袋，公公婆婆真係辛苦先得一小袋。

玲姐

公公婆婆無得食，如果生果金多些，夠佢哋用，佢哋又點會流晒大汗撐住拐杖去排隊拎完又拎吖。

泳宜

政府應該安排個社區中心派米，唔使日曬雨淋。

大隻廣

咪係囉，唔知點解一定要响露天地方派米，不如派換米券畀啲公公婆婆可以到就近7仔拎米仲好啦，又唔使响街排長龍。

阿豪

今年應該人龍更勁，派米團體應該分幾日派，每日限派一定數量，等公公婆婆有個預算吖。

Suki

好明顯香港老人福利唔夠好，政府連畀生果金都孤寒，公公婆婆拚了命都要去排番袋米過中秋。

威廉

不如政府一年派三次米畀老人家，等佢哋無咁飢渴，唔使一次爭崩頭，都算係老人福利吖。