已故全國政協副主席霍英東長孫霍啟剛同跳水公主郭晶晶熱戀係公開嘅秘密，唔知係咪因為星級女友嘅關係，啟剛同國家跳水隊嘅關係好好，日前，香港青年聯會領導層喺會展就職，大會宣布由啟剛捐出成支國家跳水隊成員嘅親筆簽名T恤做壓軸抽獎禮品，其中梗係有郭晶晶嘅簽名，啟剛咁大手筆即刻引嚟現場起哄。
啟剛現場無交代件T恤點得嚟，不過，呢份禮物一攞出嚟，全場即刻歡呼震天，似乎國家跳水隊有好多粉絲，事關個活動中，仲有一份一萬蚊現金嘅大獎，但呢件無價T恤嘅歡呼聲仲多過現金大獎。啟剛親自上台抽出幸運兒同頒獎，有與會者講笑話，啟剛頒發禮物時，面上並無流露不捨表情，反映啟剛同晶晶感情相當穩定，又或者女友就喺身邊，要簽幾個名有乜難度呢？