謝太尋日出席一個「展翅．青見計劃」嘅活動時，講到本港青少年就業情況，佢透露，經濟不景之下，青少年失業率高於整體失業數字係全球趨勢，香港青少年失業情況已經好過全球水平。謝太呢番話真係講得擲地有聲，但佢根據乜嘢數據就令人存疑。

政府統計屢出術

幫助青少年就業嘅團體一再批評政府統計失業率時，根本冇完整反映青少年待業嘅情況，長期以來，政府統計青少年失業率只係啱啱多過雙位數，最近一次有兩成四，但團體嘅統計卻高好多，同政府嘅數據差成十幾個百分點。出現咁大差距，係政府巧妙咁喺統計制度上無視待業青年，甚至一再推出展翅、青見等計劃，拖慢青少年投身人力市場所致。

講番謝太呢番豪言壯語，不禁令人諗起港府高官鍾意攀比嘅往績，歷任財政司司長動輒就話超英趕美、有啲又以紐倫港自我陶醉，家吓又有謝太話青少年失業情況媲美全球水平，真係唔知一眾港府官員係鍾意講美麗嘅謊言，定係鍾意「吹牛」？

本港唔少雙失青年都飽受搵工難、搵食難嘅苦況，聽到高官話香港嘅情況已媲美全球，唔知係火多兩錢，定係要感恩戴德呢？