申訴專員黎年新官上任三把火，呢次燒到房署班A字膊縮骨官員嘞。申訴專員公署尋日公開批評房署處理投訴索償反應被動，淨係將索償部分交畀保險公司委託嘅公證行處理就算數，對租戶受到嘅不公平對待「不聞不問」，未有履行服務承諾。申訴專員話，咁樣做解決唔到投訴嘅根源，有意展開主動調查。

嗱，即管睇吓房署做咗乜！有租戶畀剝落嘅天花擊傷向房署索償，但房署冇做任何調查，將個案掟畀公證行就關人個關，八個月都冇回音。租戶再向房署投訴，最後拖咗二十二個月至解決。亦有租戶因為樓上空置單位滲漏、大廈水缸清洗搞到熱水爐塞滿沙石、電梯濕滑跣到跌倒等要求賠償，房署統統卸畀公證行處理，既冇調查，又冇跟進。

申訴專員公署發現至少有六宗房署處理不足嘅個案，包括冇處理投訴、沒有公證行處理索償、公證行處理個案不公。講到監察仲得人驚，有啲個案甚至連紀錄都冇。可以講，房署對投訴索償基本上係「零監察」。

叮！無端白事邊個去投訴吖，貪班懶官臉色好睇咩。天花剝落、單位滲漏、熱水爐變「沙樽」、喺電梯跣低跌親，呢啲個案嚴重影響租戶生活甚至危及安全，房署居然攞公證行做擋箭牌，唔去調查引致投訴嘅起因。試問署長陳鎮源，唔親自搵出問題根源，屋邨服務點改善？管理水平點提高？唔怪得公屋問題愈來愈多，投訴愈來愈勁啦。

好似近排曝光之後畀人鬧「極不人道」嘅天水圍公屋「蚊型廁所」咁，沖得涼嚟換唔到衫，連轉身都成問題，對行動不便嘅租戶尤其係長者，更加係危險陷阱。房署三年前已經接到相關投訴，但一直闊佬懶理，卒之咪釀成有弱智人士喺廁所入面失救，幾日都冇人察覺嘅悲劇囉。

叮！房署官員唔止勁卸膊，仲超冷血添。有位年近九十歲嘅婆婆要求房署幫佢將浴缸改建為企缸，減少危險，點知房署官員居然話：「你都唔係好殘好弱啫，冠心病之嘛，改建冇得傾！」直到輕微中風，攞住醫生證明，婆婆至得償所願。

向房署投訴仲慘過對住幅牆講嘢，幅牆至少會有回音吖，投訴索償變咗泥牛入海，閒閒地一年半載冇晒聲氣。呢樣話外判，嗰樣又話唔關自己事，住戶有起事嚟都唔知可以搵邊個。再係咁，房署不如索性宣布，有事冇得投訴，索償冇得回水，話之你死罷啦。叮佢個鎯鎯！