未開鑼先鬼打鬼

東亞運火炬接力跑最後一棒地點搞到滿城風雨，卒之由TVB電視城改為金紫荊廣場，呢一場民政事務局同埋東亞運籌委會互摑嘅鬧劇，真係好睇到不得了。如果到正式比賽，臨時新增一個羽量級鬼打鬼拳擊賽事，即使入場券加到一千蚊一張，我諗好多市民都會捨得捧場。

東亞運未開鑼已經咁多蝦碌嘢，都唔係話冇理由。正所謂唔怕生壞命、最怕改壞名，東亞運個名已經改得騎呢，好易令人有不必要嘅沉痛聯想，仲以為九七之後，香港已經淪陷咗十二年零兩個月，大日本皇軍要搞個共榮小圈子「大東亞運動會」嚟沖喜添。不如搵嗰位拍過《南京！南京！》嘅陸川大導演，再喺金紫荊廣場前整番場獸兵祭天舞，呢個時勢做漢奸有運行呀，求個安心都好吖！

網友回應...X）...

[Stanley]

好心啦，呢個特區政府做乜衰乜，寫包單到時肯定好多甩漏。

[匿名]

搞乜嘢運動會吖，盞令香港出醜，不如留番啲錢派畀老人家啦。

[mike]

得嗰小貓三四隻地區參與，真係食之無味，棄之都唔覺可惜。

[小肥]

之前奧馬，領導人要煲呔曾親自掛帥，唔知今次又有乜命令呢？

[PP]

反正都係亂up，話電視台籌備台慶唔肯借場地仲有說服力。

[Yiu]

邊度搞都唔緊要，最重要係嗰度有G模跑就好咯，正呀！

[MM]

到時出了甚麼問題讓香港人蒙羞，一定要問責到底！

[W]

聽聞啲場地山長水遠，連香港人都未必識去，更何況外國旅客？