眼見廣深港高速鐵路香港段工程快將動工，但受影響土地業權人嘅賠償仲未傾掂數，特別係對石崗菜園村村民不遷不拆嘅訴求，政府好似借咗聾耳陳隻耳咁。呢次擔大旗拆彈嘅係新界鄉議局主席劉皇發個仔劉業強，佢以專業事務委員會主席嘅身份尋日再落元朗八鄉諮詢居民意見，菜園村代表仍堅持立場，唔講賠償，只要求劉業強幫手邀請運輸及房屋局局長Eva鄭汝樺落村當面對質。
原來菜園村居民九個月前已要求Eva見吓村民，但Eva一直無動於衷，有時間放兩星期大假去北海道自駕遊，都冇時間坐車入元朗聽居民意見，將個炸彈拋畀鄉議局。菜園村關注組成員希望Eva落村同居民真情對話，仲話會煲定啲白花蛇舌草畀佢清熱解毒，等佢攞個涼（良）心向居民交代清楚。
劉業強即場拍心口應承幫手，稍後仲會整理好受影響人士意見向政府提交申訴書，希望政府有新思維妥善解決事件。佢話如果政府搞好今次賠償，日後新界區其他基建發展相信會好辦得多喎！