前晚喺香港青年聯會新一屆就職禮見到做副司庫嘅莊家彬（Albert），佢之前因返西藏考察搞到鼻敏感，瘦咗成個圈返嚟，但一講開車經，佢即時生猛晒。不過，唔好以為男仔一定鍾意刺激愛揸跑車喎，原來佢咁大個仔都未試過有跑車癮，即使當年去外國讀書都冇作反偷揸。
點解咁乖？話說當年佢考車牌，爸爸大開水喉仲畀足自主權佢決定買邊款車，佢心中不禁暗叫「筍」，諗住今次可以自己話事啦，點知眉精眼企嘅爸爸即時加句︰「不過從你買乜嘢車，我就可以定性你係乜嘢人！」Albert咁醒，當然即刻收到爸爸想點，最後都係揀咗部穩打穩紮嘅Jeep仔，之後佢仲發現架車無論落雪定係山路都啱揸，果然冇揀錯。所以話呢，教仔唔係講惡嘅，係要講方法。