富貴黨現有三名立法會議員下屆繼續留守功能組別，尋日撞到前主席田北俊，佢出身工商界，喺直選中贏過亦輸過，大呻香港嘅選民至今都分唔清立法會同區議會嘅功能，唔了解前者應該關注處理啲全港性同政策性議題，好難好似啲區議員咁日日喺地區打躉，直接為選民解決啲地區問題，尤其係對於佢哋呢啲擅長經濟金融政策嘅工商黨，就更難兼顧兩者。
但田少強調富貴黨唔係全面撤出直選，只係會做好啲分工，支持啲真正有興趣同熟悉地區事務嘅黨友參戰區會或立會直選，現有三名立會議員就專注啲全港性同政策性議題；喺領導層方面，佢細佬田北辰會花多啲精神搞地區，主席劉健儀就繼續做立會「Bill后」。至於佢只會喺背後做顧問，力撐田二少同劉健儀中興富貴黨，唔會食言走番上最前線打仗。