早前火炬接力跑爆出秘密招標風波，歸根究柢係各個本地電視台都預計唔會有好多觀眾有興趣睇接力跑，冇人肯好似舊年奧運火炬接力咁免費直播，最後先搞到康文署要急急發出標書，仲被質疑係以半買半送嘅條件批畀無綫電視，製作同直播整個接力跑同之後嘅百日倒數晚會。

僅八百警員維持秩序

大家咪以為淨係啲電視台睇死接力跑收視率低，連政府本身都係咁睇。例如警方代表前日喺接力跑封路措施記者會上，點都唔肯公開估計聽日會有幾多市民喺接力跑沿途圍觀打氣，又自爆只會派出約八百名警員到場維持秩序，比舊年嘅奧運火炬接力少咗四分之三。以奧運火炬接力有十萬市民到場圍觀推算，聽日可能只有兩萬零人去撐啲東亞運火炬跑手，當中好多仲可能係咁啱行開街經過，同舊年嘅盛況完全冇得比。

部分高官亦好似唔多情願畀面撐場。例如依家改咗喺金紫荊廣場舉行嘅接力跑閉幕儀式，原先設計係由作為政府第二把交椅嘅政務司司長主禮，但唐唐當日唔喺香港，理應擔任署理司長嘅孫明揚亦外遊未返，最後要搵外號「人肉錄音機」嘅政制及內地事務局局長「林公公」林瑞麟頂上，認真失禮。

但最令人失笑嘅，係大會見舊年嘅奧運火炬接力咁受示威者「歡迎」，今次特別設置九個示威區招呼佢哋，點知至今示威零申請。須知香港有個朵叫做「示威之都」，好多人食飽飯冇嘢做就走去示威當運動，借機表達意見同訴求，依家連呢批職業示威者請東仔、亞妹食檸檬，東亞運籌委會真係要好好檢討！