豬流感賴死唔走，中招市民愈嚟愈多。呢嗱，確診感染個案尋日又多咗三百三十三宗，累計總數已經突破一萬宗。升勢未止，遲啲天氣轉冷，情況可能更嚴重。

不過，中文大學研究人員早排對一間公立醫院近四百位嚟自內科、兒科及急症科嘅醫護人員進行調查，當中以護士為主，結果發現有五成二受訪者拒絕打豬流感疫苗，主要擔心有副作用及質疑疫苗嘅安全性同成效。

叮！食衞局局長周一嶽為首嘅衞生當局，大鑼大鼓採購疫苗，好似勢在必行，唔買就走寶咁。一時公開招標，一時又話可能唔再招標，搞到一鑊泡，市民本來已經無所適從，依家連醫護人員都擺明唔做白老鼠，你話市民又邊可能有信心吖？

豬流感來勢洶洶，購買疫苗抗疫冇人反對，但抗疫唔係做騷，疫苗一定要有效，證實對人無害至好買。如果使咁大筆公帑，買番嚟得物無所用，甚至揼埋一邊漚到過期，買唔買都罷啦！至弊政府好大喜功，早排用七億元招標訂購豬流感疫苗，因為標書條款過於苛刻撞晒板，到截標日都無人問津，最終要取消招標重新嚟過，仲可能唔會公開招標添，盞攞嚟搞。

叮！豬流感疫苗係全球搶手貨，完全係賣家市場，政府無啦啦招標採購已經戇居，明知全球未有一個政府批准過豬流感疫苗註冊，仲要藥廠供應已註冊疫苗，到底想買疫苗定係想做番場「買疫苗騷」o架？

再講，就算要採購都要先確定疫苗真係有效至好買吖，依家連醫護人員都拒絕注射，證明疫苗有後遺症同效果有限嘅擔憂唔係空穴來風啦。如果買番嚟唔啱用，咪又係唔衰攞嚟衰。

話到尾，政府根本就想借抗疫做場大龍鳳，拉番起跌到阿媽都唔認得嘅民望。呢嗱，當日本港出現首宗豬流感確診個案，當局表現簡直High到暈，高調封鎖灣仔維景酒店，隔離旅客；做完騷後又冇跟進措施，結果社區防疫鬆懈，防線全面崩潰。

係人都知，對抗病毒要治本，就要改善環境衞生，教育市民養成良好衞生習慣。點知政府得鋪扮嘢癮，全城清潔日高官傾巢出動揸住掃把擺甫士，做完騷散咗場就無晒下文，全港幾十個衞生黑點嘅環境依然睇見都作嘔。

咪話唔提醒你周一鑊呀，呢次唔係三聚氰胺熊仔餅，想醫護人員同市民有信心嘅，唔該學吓國家衞生部部長陳竺，帶頭試第一劑豬流感疫苗啦。叮！