早前有人喺報章言之鑿鑿，話疑似特首候選人、行政會議召集人ＣＹ梁振英係共產黨員，雖然佢已即時澄清，但近日仍受到狙擊，尋日呢份報章繼續引述一名前港區全國人大代表，直指佢「肯定是共產黨員」，搞到佢冇辦法再沉默下去，先喺自己網誌事先張揚，晚上就上電台節目作出反擊，佢話該名前人大已澄清冇講過有關言論。
CY喺電台上強調已多次回應自己並非共產黨員，但有關報章繼續質疑佢，呢個係質疑緊佢嘅誠信，佢認為報紙應該有誠信，如果係都要質疑佢嘅話，佢都冇辦法證明自己並非共產黨員。佢好感慨咁話：「事件令我想起香港回歸十二年，仲有人用共產黨籍作為武器，去攻擊同抹黑在本港有公職嘅人。」
佢又重提舊事，話曾經有雜誌指某局長係共產黨員，仲教人區分一啲地下共產黨員，不斷散播呢啲恐怖同謠言，佢批評呢啲係不負責任手法，變成負面同打擊嘅有效工具，亂扣帽子實在好難澄清；佢苦笑話發明呢種手法嘅人都幾聰明！主持人問佢今次成為攻擊目標，係咪涉及特首選舉？佢話不排除呢個可能性，仲話呢種手法對參選特首嘅人會產生負面影響。