善良之槍令人感動

警察成日想搞特權，當其他紀律部隊係阿二，原因就係佢哋有支炮喺身。哎呀，睇吓有個老差骨連開三槍，砰砰砰，連烏蠅都打唔中，好心唔好咁大聲咯！

警察嘅槍法有幾差？之前有網民試過摷到警方射擊比賽嘅得分資料，有個師姐打四十八發子彈，只有十六發中靶，有個女輔警打破紀錄，打中七槍。冇計啦，回歸之後，皇家香港警察全部變晒人民警察，「人民警察愛人民」，賊人都係人民，點可以話射就射嘅啫。

所以曾經有個幹探捉賊時開槍，嗰把真係叫善良之槍，寧可打番隔籬嘅同袍，都唔願意打落賊佬身上，真係令人感動呀。小弟建議當局應該整個「警察槍法檢討委員會」，遇到咁善良嘅差人，立即連升三級啦！

網友回應

Ivan Wong

咁又係呀，依家見到警察都係行遠啲好，佢哋支善良之槍冇眼o架！

Grissom

唔怪得其他嘅紀律部隊條氣咁唔順啦，唓，畀支槍佢都未識開，仲講到地位幾特殊添，唔好笑大人個口啦，好唔好？

Laughing Gor

哎，以後唔好出糧畀佢哋啦，不如現兜兜出《槍王》DVD畀佢哋算啦，叫佢哋學吓嗰啲槍法，唔好咁失禮啦。

snake

做差人真係好，又唔使乜嘢技能，啱晒我哋呢啲會考零分嘅人呀！

mandom

難為佢哋仲好意思嗌加人工，唔該練好啲基本功至好講啦，仲要定期考吓試，唔合格嘅快啲革走，唔好浪費公帑。

kk

警察人工高，福利好，仲可以逆市叫加人工添，但係支槍就弱啲，不如叫佢哋減人工，投放喺軍備嗰度好過啦。

發表方法

讀者如對本欄每日話題有任何意見，歡迎登入網址發表意見。本報保留採用刊登權利，不另通知，敬請留意。 網址：www.sunsiupak.blogspot.com