兩性平等愈嚟愈受社會關注，尋日喺一個午間講座，分享《男性在推動兩性平等的角色》嘅睇法，平時敢作敢為嘅恒隆地產董事長陳啟宗開宗明義話天不怕地不怕，但除咗老婆之外。竟然自爆怕老婆，相信大家都估唔到。佢仲話喺呢個世界上，除咗老婆外，冇第二個女人鍾意佢，所以今次台下幾百個女人望住佢，都不知幾開心喎！
講到冇女人緣咁，其實平日佢畀女人包圍。事關喺佢Office有二十二個人，除咗佢之外，全部都係女職員。佢坦言自己好惡，成日鬧人，若果有女同事可以做到五年，即係對到佢五年嘅話，應該係全世界最優勢嘅女人之一。
佢仲話呢個世界上只有兩個人可以頂撞佢，一個係阿仔，另一個就係老婆嘞！通常同老婆有頂撞時，佢通常都唔出聲，費事拗氣，而兩公婆都有互窒嘅時候，比例上係十對一，即係老婆窒佢十次，佢先駁一次咁話。聽佢咁講，腦海浮現出兩句說話，其一係「一物治一物，糯米治木蝨」，另一句就係「怕老婆會發達」。