港大尋日舉行入學禮，「恒生一姐」、恒生銀行副董事長兼行政總裁梁高美懿就以港大舊生身份擔任嘉賓，佢仲記得七五年初入大學時又忙又緊張，開學就成日要去圖書館借書做project。話明係「一姐」，由細到大讀書一定名列前茅，但原來佢入咗港大後，因為競爭太大，遇過好多挫折，曾經試過預期自己份功課有A+，點知最後老師只係畀B-，佢收到成績後即時心都痛埋，到依家都難忘嗰種滋味。
呢啲跌倒嘅經歷，令佢有「求學如種菜」嘅特別體會，仲勉勵師弟妹去做「園丁」！佢比喻自己讀大學時好似園丁咁四處播種，無論最後有冇收成，都可以喺過程中獲得唔同嘅經驗，仲話自己之所以做到「恒生一姐」，都係靠做「園丁」不斷「播種」咋！
