保安局政治助理盧奕基嘅認知率奇低，外界根本唔知佢做過乜，終於到佢孭飛同啲立法會議員會面，竟然搞出個大頭佛，仲畀議員Port到去佢頂頭上司、保安局局長李少光。

去信李少光告狀

劉慧卿尋日寫信畀李少光告盧奕基一狀，話今個月二十一號聯同另一議員涂謹申、社區組織協會等團體同盧奕基會面，討論中港移交逃犯、囚犯同兩地司法互助協議、搜身嘅規管同其他保安政策等，但喺會議上，盧奕基對各項政策背景缺乏認知。

講到盧奕基好似飯桶咁噃！咁都不特止，卿姐仲話盧奕基既未能代表政府回應佢哋嘅問題，亦唔能夠澄清政府嘅立場，對絕大部分提問均支吾以對，令與會者深感憤怒同震驚，亦質疑會面根本浪費時間。

相信大家都睇到卿姐有幾火，事關佢喺會前曾經提醒過盧奕基要做足準備工夫，但盧奕基嘅表現實在令人遺憾，亦加深市民對高官問責制同委任制度嘅質疑。

交際花培訓班首炮係落十八區施政報告諮詢會，喺咁多個政助當中，盧奕基參與最少，只係去一場，唔通「班長」早就知佢連自己瓣都唔掂，其他範疇更唔使講，費事佢落區畀人插？

政助遭議員公開狂數，睇怕盧奕基係第一個。佢尋日致電我哋解畫，否認對保安政策唔熟識，話議員當日提出嘅大部分議題都牽涉長遠政策考慮，需要研究，所以未能即時回應。佢仲承諾日後會保持溝通，避免誤會。

但講到會否再約卿姐傾偈安撫吓，佢答得有保留，話會覆信畀對方，有機會見到卿姐，一定會解釋番喎！