控煙辦帶頭拒執法，煙民大可將九月一日全港學生開學日，趁吓高興定為「無懼檢控吸煙日」；若是情侶，大可一面唱K一面吞雲，製造愛在煙霧蔓延時，呢啲幸福幾鬼難得！

控煙辦督察「士氣低落」倒可以想見，只要知道領導整套工作的叫周一鑊，就知道名副其實又係一鑊泡，一味「領功」，又欠配套，又無部署。政府圖書館館長協會及政府康樂事務人員總工會，不久前去信要求撤出控煙執法名單，真係推推推，推得有道理！道理好簡單，你叫連食一粒熊仔餅都唔夠膽嘅周一鑊，去麻雀館或桑拿浴室去檢控啲煙民啦！

日前世姪來訪，央筆者與他打場桌球，於是到觀塘一桌球室。甫入門口，但見煙霧迷茫，筆者忍不住問：「明明唔畀食煙o架？點解……」「阿哥！我都冇辦法吖！勸唔聽，話唔驚，大大隻字貼出禁煙啟事都冇用。我打幾千蚊工咋，話一句啫，就畀人問候全家，你去話喇！」筆者與世姪只好去隔籬酒樓打邊爐。

民國時期，有位「馬桶將軍」王懷慶，佢行軍可以冇槍，但燙金馬桶必隨身。佢用人一定唔用書生，不管多膿包，所有軍官都要無條件忍受他打罵折辱，能逆來順受則升官有望。當年，佢訓練嘅部隊最忠心，控煙辦由佢掌舵實掂！