唔係講笑，呢個小巴限速器真係得來不易o架。唔好以為呢個裝置好簡單呀，運輸署竟然要研究、研究又研究再研究，花咗九年至搞得掂，知唔知九年時間，連穿梭機都整到出嚟o架？

叮！查實係運輸署一直懵到上心口，以為安裝車速顯示器就可以減少小巴超速事故。事實係點，大家有目共睹，所以本報一早已經提出比較有實際用途嘅，就係要強制小巴安裝限速器。

問題係運輸署一直愛理不理，如果唔係近排接二連三有亡命小巴嚴重交通事故，都未必會喺輿論壓力下忽然積極。雖然話遲到好過冇到，但如果唔係因為官僚懶懶閒，試問九年以嚟，有幾多人唔使死得不明不白呢？

好似話前排有亡命小巴喺旺角掟彎剷上行人路，已經造成無法補償嘅嚴重人命傷亡悲劇。之不過，亡命小巴雖然係到處咬人嘅市虎，但係都未及一班政府官僚咁害人，就算再多十單八單嚴重車禍，流到一地都係血又點吖，佢哋一於好少理。

舉個例，早前發生過奪命交通意外嘅旺角道、弼街、洗衣街以及亞皆老街一帶，幾乎係香港人都知嗰度係旺角中嘅旺角，一條窄窄嘅行人路，有多達十八個車站，最弊係附近食肆商舖成行成市，行人要逼住行出馬路，周不時有人車爭路嘅驚險狀況出現。

為咗改善區內嘅交通問題，油尖旺區議會八年前已經要求將位於洗衣街嘅食環署倉庫、水務署旺角辦事處以及隔籬嘅臨時停車場，改建做交通交匯處嘅商業發展項目。

有區議員指出，自從朗豪坊落成之後，上海街、砵蘭街一帶嘅交通經過重新規劃之後，交通意外當堂少咗，所以如果水務署同埋食環署肯搬走，再將地點改建為交通交匯處，嗰一帶嘅交通問題自然迎刃而解。

唔單止區議會有咁嘅建議，就連規劃署啱啱完成嘅研究，都承認呢啲土地冇被充分利用，同意可以重新發展做其他用途，建議規劃變成一個有交通交匯處嘅商業發展項目，可以紓緩區內嘅交通擠塞。

咁到底呢兩個部門有乜回應呢？食環署發言人話喎，署方積極就搬遷建議作出相應配合，仲同有關部門物色緊合適用地，重置洗衣街設施以及探討可行性。而水務署發言人就話，佢哋歡迎搬遷計劃，仲會積極配合添。

真係一天都光晒咯，佢哋滿口「積極配合」，相信一定好快成事㗎嘞。叮，呢啲咁嘅官腔，信半成都死啦！事實上，水務署喺十二年前已經獲政府批地，可以搬去元朗，不過唔知點解，至今都係賴死唔走之嘛。

咁就梗係啦！旺角區咁就腳，梗係打死都唔走啦，莫講話返工放工夠晒方便，就算平時蛇王吞泡都多啲地方去啦，搬到山長水遠嘅元朗，唔通特登攞苦嚟辛咩？

叮佢個鎯鎯，由此可見，呢班官僚一個二個都針唔拮到肉唔知痛。九年至搞得掂小巴限速器，要改建一個交通交匯處更加係遙遙無期！太一叮好想問一句：到底仲要害幾多條人命至知驚吖？